ორსანტიის საჯაროს სკოლის მე - 12 კლასის მოსწავლე, ანა კვარაცხელია, ცოტა ხნის წინ, მოკლევადიანი გაცვლითი პროგრამით, ჯერ ბოსნიაში, შემდეგ კი ხორვატიაში იმყოფებოდა.
როგორც გვიამბობს, სასწავლო ვიზიტის ფარგლებში, ის სხვადასხვა ღონისძიებაში იყო ჩართული. მისი თქმით, ბოსნიაში მიღებული გამოცდილება, საქართველოში დაბრუნების შემდეგ, თანატოლებს გაუზიარა და მათთან ერთად, რეგიონში რამდენიმე პროექტი განახორციელა, მათ შორის, გენდერული საკითხების მიმართულებით.

„ბოსნიაში ახალგაზრდებს შევხვდით, მათი გამოცდილება გავიზიარეთ, მათი მუშაობას გავეცანით, ახალგაზრდების მიმართულებით, ადგილობრივ თვითმმართველობასთან თანამშრომლობის შესახებ, იქაურ ახალგაზრდებთან გვქონდა ასევე ტრენინგ - შეხვედრები, იქაურ ტრენერთან გვქონდა ორდღიანი ტრენინგ - კურსი, გადაგვამზადეს გენდერულ თანასწორობაზე და გენდერული მიმართულებით, შემდეგ უნდა ჩაგვეტარებინა სოციალური კამპანია და ჩვენ სოციალური კამპანია განვახორციელეთ’’, - გვიყვება ანა.

17 წლის ახალგაზრდა ამბობს, რომ ბოსნიას და საქართველოს შორის ბევრ მსგავსებას ხედავს, თუმცა თვლის, რომ განათლების კუთხით, ისინი ბევრად წინ არიან წასულები.

,,ბოსნიას ძალიან ვამსგავსებ საქართველოს, იმიტომ რომ, რეალურად ერთმანეთს ჰგავს. განვითარების თვალსაზრისით ბოსნია არ არის მოწინავე ქვეყნებს შორის, მაგრამ ცდილობს, ის ბნელი მხარე, რომელიც აქვს, აღმოფხვრას და უკეთესებისკენ იბრძოლოს. ჩვენს გამოცდილებას რომ ვუზიარებდით იქაურ ახალგაზრდებს და ისინი რომ გვიზიარებდნენ გამოცდილებას, ძალიან ჰგავდა ჩვენი მუშაობის სისტემა ერთმანეთს, რა თქმა უნდა, განათლების კუთხით წინ არიან’’, - აღნიშნავს გაცვლითი პროგრამის მონაწილე.

ხორვატიაში ათდღიანი სასწავლო ვიზიტი მისთვის ასევე შთამბეჭდავი აღმოჩნდა, საჭირო ინფორმაციის და ახალი უნარების შეძენის თვალსაზრისით, რაც, მისი თქმით, შემდგომში სწორი ნაბიჯების გადადგმაში დაეხმარება. 

,, ხორვატიის კუნძულ სპლიტზე გვქონდა ათდღიანი ტრენინგ - კურსი, პლასტმასის გამოყენებასთან დაკავშირებით, არაფორმალურ გარემოში ვიმუშავეთ ეკოლოგიურ საკითხებზე, მივიღეთ ინფორმაცია ნარჩენების მართვაზე და შემდეგ უკვე შევქმენით ციფრული საინფორმაციო ბუკლეტი იმის შესახებ, თუ როგორ შევამციროთ ეკოლოგიური კვალი ყოველდღიურ ცხოვრებაში. იყვნენ უკრაინიდან, ფინეთიდან, ესპანეთიდან და თურქეთიდან. ამ ახალგაზრდებთან ერთად კულტურული მიმოცვლისთვის საოცარი გამოცდილება იყო .იქ ვიყავით ისეთ ახალგაზრდებთან, რომლებიც ძალიან განსხვავებულები არიან ჩვენგან, როგორც კულტურით, ასევე განათლების სისტემით. მათთვის უჩვეულო არაფერი არ იყო. ჩვენგან ვინც იყვნენ ახალგაზრდები, საქართველოდან, გვიკვირდა იქაური მდგომარეობა, როგორი თავისუფლები არიან. დღის ბოლოს იყო კონკრეტული ქვეყნის კულტურული საღამო, სადაც ისინი თავიანთ კულტურას, ისტორიას, ცეკვას, კერძებს გვაცნობდნენ. ევროპული განათლება რაღაცნაირად უფრო ძლიერია, თითქოს უფრო მაღალ სტადიაზე დგას, თითქოს მათთვის გასაკვირი არაფერი არ არის. თან ევროპულ ქვეყნებში მიღებული განათლებით შეგიძლია ევროპის მოწინავე უნივერისტეტებში მოხვდე’’, - გვითხრა მან.

ანა კვარცხელიამ, რომელიც 14 წლიდან არასამთავრობო ორგანიზაცია ,,ნეოგენის’’ აქტიური წევრია, თანატოლებისთვის ევროპაში მიღებული ცოდნის გაზიარება და სოფელ - სოფელ ტრენინგების ჩატარება, ჯერ კიდევ, გასული წლის მარტში დაიწყო.

როგორც ის რადიო ,,ათინათს’’ უყვება, ახალგაზრდებს ევროპულ განათლებაზე და ევროინტეგრაციის მნიშვნელოვან საკითხებზე ესაუბრება. ამბობს, რომ ახლა სოფლებში რთული სიტუაციაა და სკოლის დირექტორებთან ,,ბრძოლა’’ უწევს.

აქციის პირველივე დღეებიდან, ქალაქის ცენტრში სხვადასხვა ასაკის მოქალაქეებთან ერთად, აპროტესტებს ,,რუსულ’’ კანონს. ასევე თანატოლებს საჭირო ინფორმაციას აწვდის, იმის შესახებ, თუ რატომ არის ეს პროტესტი მნიშვნელოვანი.

,,დღეს შედარებით რთული სიტუაციაა. მე, მაგალითად, სკოლის დირექტორებთან „ბრძოლა“ მიწევს, იმის გამო, რომ საგაკვეთილო პროცესის შემდეგ ბავშვებს არ უშვებენ მათი სურვილისამებრ, რომ ტრენინგებს დაესწრონ და სრული კატასტროფა ხდება სოფლებში, იმიტომ, რომ ბავშვებს იმას არ აკეთებინებენ, რაც მათ რეალურად სურთ. ყოველდღე ველზე ვდგავარ და ვებრძვი დეზინფორმაციას. თუ კარებს არ გამიღებენ ფანჯრებიდან შევდივარ , ფანჯრებს დამიკეტავენ, ბავშვები აქეთ გამომყავს და ვცდილობ მათ ღირებული ინფორმაცია მივაწოდო’’, - გვითხრა ანამ.

მას მიაჩნია, რომ თითოეულ მოქალაქე ვალდებულია, რომ პროცესებში აქტიურად ჩაერთოს და დაიცვას ევროპული ღირებულებები. ამიტომაც, თვლის, რომ მნიშვნელოვანია, გააპროტესტო ის, რაც არ მოგწონს, უკეთესი მომავლისთვის.

„აქციების მიმდინარეობის პროცესი ალბათ ერთადერთი იმედია ჩემთვის და მჯერა, რომ შედეგს გამოიღებს’’, - დასძენს ის.

ანა სწავლის გაგრძელებას ბაკალავრიატის და მაგისტრატურის საფეხურებზე ევროპაში გეგმავს. სამომავლო პროფესიად პოლიტიკური მეცნიერებები აირჩია, რაშიც, მისი თქმით, განსაკუთრებული როლი გაცვლით პროგრამებში მონაწილეობამ და ქვეყანაში მიმდინარე პროცესებმა ითამაშეს.

ეს სტატია მომზადდა ევროკავშირისა და გაეროს განვითარების პროგრამის ფინანსური მხარდაჭერით. მის შინაარსზე პასუხისმგებელია მხოლოდ [ავტორი] და შესაძლოა არ ასახავდეს ევროკავშირისა და გაეროს განვითარების პროგრამის შეხედულებებს.

This article was produced with the financial support of the European Union and UNDP. Its contents are the sole responsibility of [AUTHOR] and do not necessarily reflect the views of the European Union and UNDP.